Urukiko rwemeje ko Ingabire na Major Uwumuremyi bafungwa by’agateganyo

Kuri uyu wa kabiri tariki ya 26 Ukwakira urukiko rwisumbuye rwa Gasaba rwategetse ko Madame Ingabire Umuhoza Victoire, umukuru w’umutwe wa politiki FDU-Inkingi utaremerwa mu Rwanda na Major Vital Uwumuremyi bafungwa by’agateganyo iminsi mirongo itatu mbere y’uko urubanza rwabo rutangira kuburanishwa mu mizi kuko ibyo baregwa bikomeye.

Ingabire Victoire na Major Uwumuremyi binjiye mu rukiko bambaye amapingu, baregwa ibyaha byerekeranye no kurema umutwe w'iterabwoba witwa Coalition of Democratic forces (CDF ) hagamijwe guhungabanya ubusugire bw'ibihugu n'umudendezo wa rubanda. Kuri uyu wa mbere Major Uwumuremyi akaba yaremeye ibyo aregwa akanabisabira imbabazi, mu gihe Ingabire we yabihakanye yivuye inyuma, avuga ko ibyo birego bishingiye ku mpamvu za politiki.

Ingabire Victoire yafashwe mu minsi ishize nyuma y’aho umwe mu bari abayobozi ba FDLR ariwe Major Vital Uwumuremyi afatiwe ashaka kwinjira muri Congo, hari tariki 13/10/2010. Nyuma umuvugizi w’ubushinjyacyaha Augustin Nkusi yaje gutangaza ko uwo musirikare na Ingabire bari mu migambi yo gushinga umutwe w’iterabwoba witwa (CDF), ukaba ngo waragombaga gushamikira kuri FDU Inkingi iyobowe na Ingabire.

Bombi bakaba barasabaga kuba bafunguwe by'agateganyo, aho Major Uwumuremyi yasabaga koroherezwa agafungurwa ngo abashe gufasha ubutabera nk'umuntu wemeye icyaha, mu gihe Victoire Ingabire we yavugaga ko ibyaha aregwa bisa n'ubundi n'ibyo yarezwe mu rundi rubanza, akaza gufungurwa by'agateganyo. Ibyo byose urukiko rukaba rwabiteye utwatsi rukemeza ko abaregwa bombi bafungwa by'agateganyo.

Hagati aho kandi Ingabire hari bindi byaha aregwamo n’abandi barwanyi ba FDLR babiri aribo Lt. Col Tharcisse Nditurende na Lt. Col Noel Habiyaremye nabyo byerekeranye no gushaka guhungabanya umutekano w’igihugu bafatanyije na Paul Rusesabagina.

Major Uwumuremyi we yafatiwe muri Congo Kinshasa muri Operasiyo Umoja Wetu yaje gukora kandi ingando zigenewe abarwanyi batahuka bava mu mashyamba ya Kongo, nyuma asubizwa mu buzima busanzwe amaze guhabwa indangamuntu ariko nk’uko nawe ubwe abyemera ageze i Kigaki yakomeje gukorana n’uwitwa Jacky Chan hamwe na Kanyamibwa Jacques ndetse na Ingabire ku birebana no gushinga umutwe CDF. Ubushinjacyaha bwagaragaje ko nyuma y’aho Ingabire agereye mu Rwanda yakomeje gukorana na Major Vital Uwumuremyi mu bikorwa bitandukanye akaba yari no muri komite yari ishinzwe kumwakira ndetse akaba ari nawe washakiye Ingabire icumbi ndetse asinya no ku masezerano y’ubukode. Ageze mu Rwanda kandi ngo Ingabire Victoire ibikorwa byose byerekeranye no gushinga umutwe wa CDF yabishinze Major Uwumuremyi ngo azabifatanye na Jacob Camba ariwe Kanyamibwa Jacques uba mu Bufaransa, Ingabire we agakurikirana igikorwa cyo kwandikisha umutwe wa FDU Inkingi.

Victoire Ingabire yatahutse mu Rwanda ku itariki ya 16 Mutarama 2010, aje kwandikisha ishyaka rye kugirango azabashe guhatana mu matora y’umukuru w’igihugu yabaye ku itariki ya 09 Kanama. Yatawe muri yombi tariki 14/10/2010, akaba kandi yari yarigeze nanone gutabwa muri yombi na polisi y'igihugu, hari kuwa Gatatu tariki 21/4/2010, kubera ibyaha yaregwaga birimo gushishikariza abagize imitwe y’iterabwoba kurikora, ivangura n’amacakubiri hamwe n’ingengabitekerezo ya Jenoside. Nyuma yaje kurekurwa by'agateganyo, ubu akaba yari agikurikiranwa n'inzego z'ubutabera, aho atari yemerewe gusohoka mu gihugu.

Simbizi Calixte (Kigari / Rwanda)